Porrusaldaren osagai nagusia porrua da. Porruari patatak, azenarioa edo beste barazki batzuk gehitzen zaizkio. Egosteko erabiltzen den ura ur arrunta edo beste barazki batzuk egosteko salda izan daiteke; baita oilasko-salda ere. Olio eta gatz zorrotada bat ere bota ohi zaio. Baina oinarri horren gainean bertsio asko daude. Izan ere, seguru asko zuetariko askok ‘porrusalda’ baino gehiago prestatuko duzue ‘porrupatata’; agian kalabaza botako diozue, edo zergatik ez: arraina ere botako diozue (zurrukutuna, Bizkaia aldetik).
Baina zein da porrusaldaren errezeta originala?
Sentitzen dugu, baina ez dakigu horri erantzuten. Baina ez dizugu esku hutsik utziko: GURE porrusalda-errezeta utziko dizugu. Tupper bat eskatzeko modukoa!
Osagaiak (4 pertsona):
- 3 porru handi
- 2 patata ertain
- Tipulin 1
- 3 azenario ertain
- 1,5 litro salda edo ur
- 3 koilarakada oliba-olio
- Gatza
Kozinatzeko jarraibideak:
- Porruak, tipulinak, patatak eta azenarioak garbitu eta zuritu. Zurituak daudenean zati txikitan txikitu.
- Lapiko handi batean oliba-olioa gehitu, su ertainean jarri eta zatitutako barazkiak sueztitu.
- Gehitu salda / ura eta igo sua maximora. 20 minutuz egosi.
- Barazkiak samurtu direnean, gatza gehitu eta 10-15 minutuz utzi atseden hartu dezan (zaporea hartzeko).
Eta zuk, nola kozinatzen duzu plater hau? 😊
