Kolore kolore, ta gustu guztiak - Tolosako Azoka

Kolore kolore, ta gustu guztiak

#Azoka lagunak
Denontzat ez dira berdinak. Horregatik, gaur, zure gustokoenak diren barazkiak aprobetxatzeko errezeta bat dakarkigu: barazki-enpanadillak! Gurea proposamen bat besterik ez da izango; zuk, egin itzazu zuk nahiago dituzun - edo eskuragarri dituzun barazkiekin!

Hemen klik eginda Tolosako Azokan topatu ditzakezun barazki guztiak daude zerrendatuta, aurreko larunbatean izan zuten prezioarekin, errezeta hau kozinatzeko inspiratu zaitezen. Hori bai, sorpresaz baratzak aste honetan beste zerbait eman badigu larunbatean azokara eramango dugu. Hurbiltzea izango da ikusteko modu bakarra!

Gure errezetan alberjinia (berenjena) eta kalabaza erabili ditugu, haragiaz gain, enpanadillen barrubetea egiteko. Orea zuk zeuk egin edo egindakoa erosi erabaki beharko duzu. Etxeko txikienekin egitea da gure proposamena!

ERREZETA: ALBERJINIA, KALABAZA ETA HARAGI ENPANADILLAK

Osagaiak: Barrubetea

Tipula bat
Baratxuri ale bat
Alberjinia handi bat
Kalabaza zati bat (250g. inguru)
Txahal haragi xehatua (250g. inguru)
Tomate saltsa edo tomate bat xehatua
Ardo txuri pixka bat
Oliba olio birjina
Gatza
Espeziak gustura (piperbeltza,…)

Osagaiak: Enpanadilla orea:

Ura (110 ml)
Oliba olioa (110 ml)
Irina (350g)
Gatza
Arrautza, enpanadillak gainetik pintatzeko

ENPANADILLEN ERREZETA, PAUSOZ PAUSO:

  1. Tipula xehatu eta zartagi batean erregosten jarri, oliba olioarekin, su baxuan.
  1. Tipula erregosten ari den bitartean baratxuria txikituko dugu eta zartagira gehitu.
  1. Alberjinia eta kalabaza ere, azala kendu eta xehatu eta zartagira gehituko ditugu. Bertan erregosten utziko ditugu bigundu arte.

Alternatiba: Alberbijinia eta kalabaza labean ere erre daitezke aurrez, bigundu arte (gutxi gorabehera 30 minutuz, labea 180ºtan). Alberjiniaren kasuan labanarekin ebaki batzuk egingo dizkiogu labera sartu aurretik, lehertu ez dadin. Kalabaza xerratan moztuta jarri dezakegu. Ondoren, txikitu eta zartagira gehitu.

  1. Ondoren haragi xehetua gehituko dugu zartagira, sua fuertexegoa jarriz, sofritoarekin batera kozinatu dadin.
  1. Momentu honetan botako diogu gatza.
  1. Ondoren ardo txuria gehitu dugu, eta alkohola ebaporatzen utzi. Honek gure barrubeteari samurtasuna emango dio.
  1. Tomate saltsa edo xehatutako tomatea gehituko dugu orain, eta denbora batez utziko dugu dena elkarrekin erregosten, zapore guztiak nahasteko.
  1. Barrubetea amaituta, hozten utziko dugu eta bitartean orea egiten joango gara (egindakoa erosi ez badugu):  lehenengo ura eta olioa gatzarekin nahastuko ditugu, eta ondoren irina gehitzen joango gara (eskuz nahastuz edota sukaldaritza-robot bat erabilita). Oreak biguna izan behar du, baina ez dadila eskuetan pegatu (hala bada, gehitu irin gehiago). Utzi trapu heze batez tapatuta, ordubetez.
  1. Behin orea prest dugula eta barrubetea hoztuta dagoela, orea zabaldu (ez utzi oso lodia) eta zirkuluetan moztuko dugu. Ore-zirkulu hauek barrubeteaz bete, eta itxi egingo ditugu erditik tolestuz. Sardexka batekin ertzari forma emango diogu. (Garrantzitsua da barrubeteari soberan duen olio/likidoa kentzea, orea ez izorratzeko).
  1. Behin enpanadillak prest ditugula, labean egingo ditugu 10 minutuz 200ºtara.

Eta listo! 

Instagramen elkarbanatu dugun bideo honetan ikusi dezakezu pausoz pauso nola egin ditugun guk enpanadillak: