Baratxuri zopa
Negu-giroan ohikoa izaten da gurean, baina haragirik gabe egina dagoenez, Aste Santuan jatea ere ohitura izan da etxe askotan. Plater xumea da: baratxuria, zopako ogia, arrautza, ura, olioa eta gatza baino ez ditu. Bada piperhautsa gehitzen dionik ere. Bazkari-afaritarako ez ezik, hamaiketako gisa ere jaten da. Badakizu nola egiten den? Ikusi errezeta.
Porrusalda
Euskal gastronomiako beste ikurretako bat da, hau ere xume bezain goxoa. Porruak, patata, tipulina eta azenarioa dira plater honen osagai nagusiak. Guztia, beraz, Azokan bertan eros daiteke. Hemen duzu errezeta.
Garbantzu potajea, espinaka eta bakailaoarekin
Egunotako klasikoetako bat da. Hiru osagai horiez gain, bi tipula, lau baratxuri ale, ogi xerra bat, gatza, piperhautsa eta olioa erabiltzen dira. Lehenengo baratxuria eta tipula erregosten da, eta ondoren garbantzuak –beratuta izatea komeni da– espinakak eta ogia gehitzen zaizkio. Guztia egosi eta amaitzear dagoenean, bakailaoa gehitu eta bost bat minutuz uzten da. Behin eginda dagoela, arrautza egosia ere gehitzen diote beste batzuk.
Bakailao gehiago
Bakailaoa plater askotan errepikatzen den osagaia da. Izan patata egosiekin, piper beteak edo kroketak egiteko, edo saltsan kozinatzeko: pil-pil erara edo saltsa berdean. Aukera anitza da!
Torradak
Aste Santuko postrerik tipikoena da. Familia–giroan prestatzeko oso aproposa, gainera. Ogi xerrak, esne litro bat, arrautzak, limoi bat, kanela, olioa eta azukrea behar dira. Lehenengo esnea egosi behar da, kanelarekin eta limoi azalarekin. Hoztutakoan, ogi xerrak esnetan bustitzen dira. Gero, arrautzeztatu eta frijitu egiten dira. Zerbitzatu aurretik, sukaldeko paperetan bilduta uzten dira, olioa ondo xurgatzeko, eta azukre eta kanela-hautseetan errebozatzen dira. Azokako ogi artisaua oso aproposa da gisa honetako postreak egiteko!
Pella edo esne frijitua
Torraden oso antzeko gozoa da, baina kasu honetan, ez da ogirik erabiltzen. Esnea, esne kondentsatua, kanela eta limoi azala egosten dira lehenengo. Beste edalontzi batean, esne hotza eta arto-irina nahasten dira, eta egositako nahasketara gehitzen da, bitartean ondo nahasiz, kremaren antzera loditu arte. Lortutakoan, ondo hozten utzi behar da hainbat orduz. Behin hori eginda, zatitan moztu, arrautzeztatu, frijitu eta azukre/kanelan bustitzen dira, torraden antzera.
