Gauza bat argi geratu bazitzaigun ikastarora hurbildu ginen azoka lagunei, ondorengoa izan zen: perretxikoak eta onddoak gastronomikoki ematen diegun balioa baino askoz ere garrantzitsuagoak dira. Izan ere, ezinbestekoak dira ekosistemarentzat; zer esanik ez, ingurunea, guk ezagutzen dugun bezalakoa izan dadin. Erabilpen gehiago ere badituzte; edertasun-produktuak egiteko, medikuntzarako...
Zientifikoki izaki kuriosoak dira, eta uste oker ugari ditugu gai honi dagokionez: perretxiko guztiak onddoak direla esan zigun Unai Fernandesek. Izan ere, onddoa lurraren azpian dagoen “sare handi bat da”; perretxikoa, berriz, gainazalean topatuko dugun -eta betidanik perretxiko izenpetu dugun- ageriko zati hori (onddoak ugaltzeko duen modua da). Alegia: perretxiko guztiak onddoetan daude, baina onddo guztiek ez dituzte perretxikoak ematen.
Hau guztia ikasi ondoren, perretxikoen oinarrizko ezberdintasunak ezagutzen hasi ginen. Horretarako, basotik paseoan ibili ginen eta momentuan zalantza guztiak argitzen joan ahal izan genuen: zein diren jangarriak eta zein ez, zein diren barietate ezberdinak… Aldi berean, perretxikoak biltzera joaten garenean bete beharreko arauak zergatik diren horren garrantzitsuak ulertu genuen (artikulu honetan dituzu gomendioak!). Adibidez: ez hartu ezagutzen ez duzun ezer; ezagutzen ez baduzu, ez kendu/bota/hautsi; eta perretxikoak mozterakoan, moztu azpi-azpitik.
Ikusi argazki guztiak!
Noizbait zalantzarik izan baduzue, zuen interesekoa izango da Aranzadiko Mikologika Sailak astelehenero euren zentroan jartzen duen arreta gunea: bertaratu eta laguntzeko prest topatuko dituzu!
Eta gogoratu zuk ere Azoka Lagunentzat egiten ditugun ikastaro eta bisita gidatuen berri izan nahi baduzu, gure buletina jasotzeko harpidetza egin dezakezula.
