Zeri erreparatu ilarrak erostean
Ilarrak erosterakoan, garrantzitsua da kontuan hartzea lekak ondo, leun eta sendo izatea, kolore berde homogeneoarekin, beltzunerik eta zulorik gabe. Lekak ondo egotea lagungarria izango da kontserbatzeko.
Baina, zenbat erosi? Dena erlatiboa da, baina leka barruan erosiz gero, nahi dugun ilar kopuruaren bikoitza erosi behar da, gutxi gorabehera. Hau da, kilo erdi ilar nahi badugu, kilo bat leka erosi beharko dugu. Izan ere, leka bakoitzak 4-10 ilar izan ditzake.
Ilarrak leka barruan gorde
Ilarrak erosi eta egun berean jateko ez badira, onena bere leka barruan gordetzea izango da, garbitu gabe. Horrela, hozkailuaren barruan 12 bat egun iraun dezakete. Jango diren egun berean aterako genituzke lekatik.
Hala ere, denbora horretan kondentsazioagatik sor daitekeen hezetasunik ez sortzen saiatu, bestela hondatu egin baitaitezke. Gomendagarriena paper xurgatzaile pixka bat jartzea da, hezetasun guztia har dezan. Hozkailuko leku hotzenean gorde, barazkien kajoian esaterako.
Nola kontserbatu zurituta dauden ilarrak
Ilarrak lekatik ateraz gero edo zurituta erosiz gero, lau bat egun iraun dezakete egoera onean, baldin eta ondo itxitako ontzi batean eta hozkailuan gordetzen baditugu. Hori bai, lehenbailehen kontsumitzea komeni da.
Nola izoztu ilarrak
Ilarrak izoztu nahi izanez gero, lehendabizi apur bat egosi beharko dira. Horretarako, ur ugari irakin behar dugu eltze batean, eta ilarrak gehitu irakite-puntura iristen denean. Bi minutuz sutan eduki ondoren, lapikotik atera eta ur hotzez betetako edukiontzi batera bota behar dira (urak izotzik badu, hobe) egostea mozteko. Hoztu ondoren, xukatu, paper xurgatzailearekin lehortu eta ontzi batean gorde, izozteko. 6-8 hilabete iraun dezakete.
Bide batez, behin izoztuta, berriro erabiltzeko ez da beharrezkoa izango desizoztea, eltzera edo zartaginera bota daitezke zuzenean.
Zenbat irauten dute ilarrek kozinatu ondoren?
Ilarrak kozinatu ondoren ere gorde daitezke. 10 minutu inguruan egosten dira, baina hori nahi dugun puntuaren arabera: al-dente nahiago baditugu, gutxixeago; egosiago nahi izanez gero, gehiago. Betiere saihestu desegiten hasten diren puntura iristea. Ondoren, hozkailuan gorde ditzakegu ontzietan, eta 7 egun igaro aurretik kontsumitu behar dira.
Nola egin ilarrak kontserban
Beste aukeretako bat ilarrak kontserban gordetzea da, hutsik dauden kristalezko potoetan. Ilarrak garbitu eta egosi ondoren, aurrez esterilizatutako kristalezko poteetan gordetzen dira, eta egosteko erabilitako urarekin estali. Tapa itxi ondoren, potoei buelta eman eta 12 orduz utziko ditugu, hutsa ondo egin dadin. Onena leku ilun, fresko eta lehor batean gordetzea izango da, ondo kontserba daitezen. Beste aholku bat: jarri noiz egin den kontserba.
Eta zer egin ilarren lekekin?
Janaria hobeto aprobetxatzeko azken aholku bat: ez bota lekak. Izan ere, beste plater mota batzuk prestatzeko balia daitezke, hala nola kremak, gisatuak edo saldak. Horretarako, komeni da puntak eta barruan duten zuntz txiki hori kentzea. Behin egosita, ukitu berezia emango diote prestatuko duzunari.
