Geraneo Zonal
Balkoi eta terrazak kolorez blaitzen dituen lorerik ohikoenetako bat da. Lore handiak eman ohi ditu, kolore oso bizikoak: gorriak, zuriak, arrosak edo fuksiak, batik bat. Eguzkiaren zuzeneko argia atsegin dute, hori baita loratzeko gakorik nagusiena. Lehorteak ondo jasaten ditu, baita plagarik ohikoenak ere. Baina kontuz gehiegi ureztatuz gero: sensiblea da oso.

Begonia
Oso loretsua izateagatik da ezaguna. Tamaina handiko lore koloretsuak ematen ditu, eta loraldia udazkenera bitarte luzatzen da. Erdi-itzaletan egotea atsegin du –hosto handiago eta ugariagoak izango ditu, eta lore gutxiago–, nahiz eta ongi garatu daitekeen erabateko eguzki izpiekin –kasu horretan, hosto gutxiago eta lore gehiago izango ditu–. Modu konstantean ureztatu behar da, uda partean, astean 3-4 bat aldiz, hori bai: hostoak busti gabe. 

Tagete
Hori, laranja edo bi koloreen nahasketako lore ederrak ematen ditu. Lore nahiko luzexkak izan ohi dira, 30-40 zentimetrora arte hazi baitaitezke. Eguzkiaren zuzeneko argia atsegin du, eta uda garaian ur asko behar du, hori bai, drainatze egokiarekin. Ihartutako loreak kentzen joatea komeni da, loratzen jarrai dezan. Baratzeginan oso erabilia da, landare-zorria ekiditeko.

Alegria
Lorezaintzan hasi berriak direnentzat aproposa da, zaintza aldetik ez baitu aparteko lanik eskatzen. Gainera, erresistentzia handikoa da. Lore ugari ematen du, eta azkar. Batik bat, kolore gorri eta arrosekoak topatu ditzakegu Azokan. Eremu oso argitsuak behar ditu, baina eguzkiaren zuzeneko esposiziotik at, loreak ihartu ez daitezen. Ingurua heze mantentzea komeni da, hortaz, uda garaian ia egunero ureztatu beharko da.

Berbena
Landare bizikorra, hau da, bi urte baino gehiago bizi daitekeen landarea da. Lore txikikoa da, unbela ugarikoa dena-den. Aldiz, bere hostoak zerradunak dira. Uda garaian ematen du lore gehien. Eguzki-argia atsegin du, batik bat, hobe zuzenean bada. Izozteak, aldiz, ez ditu ondo toleratzen, hortaz, babestu egin beharko dira. Udan asko ureztatu behar da, lurra etengabe heze mantenduz.

Alyssum
Kolore zuriko lore txiki ugari ematen dituen landarea da. Hainbesteraino loratzen da, non bere hostotza estaltzeraino ere iritsi daitekeen. Ezti usain atsegina dute loreek. Udaberri amaieran eman ohi du lore gehien, eta tenperatura leunen irauten duten arte jarraitzen du loratzen. Ihartutako loreak kentzea komeni izaten da, loraldi hobea izateko. Eguzki-esposizio zuzena atsegin du, eta ez du askotan ureztatzea behar, tenperatura oso altuak diren egunetan izan ezik. Intsektu polinizatzaileak erakartzen ditu, eta landareak ezaugarri diuretikoak ditu.

Iberis
Alyssum-aren antzeko landarea da. Kolore zuriko loreak ematen ditu, mordoxka ederretan bilduta, nahiz eta zenbaitetan lila edo arrosa kolorekoak ere izan daitezkeen. Hilabetez loratzen da, udaberrian. Tenperatura leunak atsegin ditu, baita eguzkiaren zuzeneko argia ere. Udako egun beroenetan kontuz ibili beharko da: inguruan putzuak ez eragin, sustraiak ez kaltetzeko. Udazkenera arte bi astez behin abonua ematea komeni da, garatzen laguntzeko.

Landare aromatikoak
Sukaldaritzan ere erabiltzeko modukoak diren landare ugari landatu ditzakegu orain, baita etxeetako balkoietan ere. Baratzeen kasuan, gainera, izurri eta plagak babesten laguntzen dute. Esate baterako, erromeroa, tipulina, oreganoa, albahaka, ezkaia edo menta. Sukaldean behar den bakoitzero hostoak kendu daitezke, gainera!